හිස්තැන්

හිත හිස් වෙලා
හිතන්නට මොකවත්ම
නැත්තටම නැති තරම්
හිතෙන්නට කිසිවක්ම
දැනෙන්නෙත් නැති තරම්
පතන්නට හිතුමතේ
පැතුමන්ද නැති තරම්
හිත හිස් වෙලා

මුව ගොළු වෙලා
මුමුණන්න මුව පුරා
කවියක්ද නැති තරම්
ගයන්නට හිත පුරා
ගැයුමන්ද නැති තරම්
තොල'තරින් ගිලිහෙනා
පදබැඳුම් නැති තරම්
මුව ගොලුවෙලා

නෙතු වියැළිලා
උනන්නට නෙතු පුරා
උල්පතක් නැති තරම්
හෙළන්නට ඉකි ගසා
කඳුළැල්ද නැති තරම්
හිනාවී හිනාවී
ඇඬෙන්නෙත් නැති තරම්
නෙතු වියැළිලා

මඟ පැටළිලා
කවුරුන්ද කාගේද
මතකයක් නැති තරම්
කොහේදැයි කෙසේදැයි
හසරක්ද නැති තරම්
කවදාක කෙලෙසකද
නිනව්වක් නැති තරම්
මඟ පැටළිලා